ഇത്തിരി നാട്ടുകാര്യം... (എന്റേയും..)

ഇത്തിരി നാട്ടുകാര്യം... (എന്റേയും..)

വലിയ ആര്‍ഭാടങ്ങളൊന്നുമില്ലാത്തതാണ് എന്റെ നാട്.... മനോഹരമായ വിനോദ സഞ്ചാരകേന്ദ്രങ്ങളോ വൈകുന്നേരങ്ങളെ ആഘോഷമാക്കാന്‍ വലിയ ബാറുകളോ ഒന്നും ഇവിടെയില്ല.

പക്ഷെ എവിടെപ്പോയാലും തിരിച്ചു വിളിക്കുന്ന എന്തോ വല്ലാത്തൊരു കാന്തിക ശക്തി ഈ മണ്ണിനുണ്ട്. വോളിബോളിനെയും നാടകങ്ങളെയും പ്രണയിക്കുന്ന നാട്ടുകാര്‍... അക്രമങ്ങളുടെ തുടര്‍ക്കഥകള്‍ ഇവിടെ ഉണ്ടാകാറില്ല... ബോംബുകളുടെയും കത്തികളുടെയും രാഷ്ട്രീയം ഇവിടെയില്ല... ഉണ്ടാകുന്ന ചെറിയ തീപ്പൊരികള്‍ വളരെ വേഗം കെട്ടുപോകുന്നുണ്ട്.. അങ്ങനെ സ്‌നേഹത്തിന്റെയും സാന്ത്വനത്തിന്റെയും സ്പര്‍ശമാണ് ബാലുശ്ശേരി പകരുന്നത്... ചുറ്റിലും മണക്കുന്ന ചോരയുടെ ഗന്ധങ്ങള്‍ അറിയുമ്പോള്‍ ഈ നാട് അങ്ങനെയൊന്നും മാറരുതേ എന്ന പ്രാര്‍ത്ഥനയാണ് ഞങ്ങള്‍ക്ക്....

സഫലമായ കാവ്യ ജീവിതത്തിലൂടെ മലയാളി മനസ്സുകള്‍ നെഞ്ചേറ്റിയ എന്‍ എന്‍ കക്കാട് ജീവിച്ചിരുന്നത് ബാലുശ്ശേരിക്കടുത്തുള്ള അവിടനല്ലൂര്‍ ദേശത്താണ്... മംഗലശ്ശേരി നീലകണ്ഠനേയും പ്രാഞ്ചിയേട്ടനേയും നമുക്ക് സമ്മാനിച്ച രഞ്ജിത്ത് ജനിച്ച് വളര്‍ന്നത് ഇവിടെയടുത്ത് കരുമലയിലാണ്... പിന്നെയും പിന്നെയും ആര്‍ദ്രഗാനങ്ങളിലൂടെ മനസ്സിന്റെ പടികടന്നെത്തുന്ന ഗിരീഷ് പുത്തഞ്ചേരിയും ബാലുശ്ശേരിയില്‍ നിന്ന് അധികം ദൂരെ ആയിരുന്നില്ല...

കടലില്ല.. റെയില്‍വേ സ്റ്റേഷനില്ല.... വലിയ ഷോപ്പിംഗ് മാളുകളില്ല.... വൈകുന്നേരങ്ങളില്‍ സമയം ചെലവിടാന്‍ ഒരു നല്ല പാര്‍ക്ക് പോലും ഇവിടെയില്ല.... പക്ഷെ ബാലുശ്ശേരി ഒരിക്കലും മടുപ്പിച്ചിരുന്നില്ല.... ശീതീകരിച്ച ബാറില്ലാത്തതിനാല്‍ നേരെ കൈരളി റോഡിലേക്ക് ചെല്ലും. പൊളിച്ചു നീക്കപ്പെട്ട കൈരളി ടാക്കീസിനടുത്ത് ഒരു മദ്യഷോപ്പുണ്ട്... ഇന്നേ വരെ കേട്ടിട്ടില്ലാത്ത ബ്രാന്റുകളുടെ ആറാട്ടാവും അവിടെ... പേരുകേട്ട നല്ല മദ്യങ്ങളൊന്നും അവിടെയുണ്ടാവില്ല.. എല്ലാം ഡ്യൂപ്പാണെന്ന് നാട്ടിലെ പ്രമുഖ കുടിയന്‍മാര്‍ അടയാളപ്പെടുത്തുന്നു. എങ്കിലും ഞങ്ങള്‍ ബാലുശ്ശേരിക്കാര്‍ ഈ മദ്യഷാപ്പുകൊണ്ട് തൃപ്തരാകുന്നു.

പഴയ ഉദയ പാരലല്‍ കോളെജ് നിന്ന സ്ഥലത്ത് ഇപ്പോള്‍ ഒരു കള്ളു ഷോപ്പുണ്ട്. നല്ല വൃത്തിയുള്ള കോണ്‍ക്രീറ്റ് ചെയ്ത കെട്ടിടം. ആരുടെയും ശല്യമില്ലാതെ നല്ല നാടന്‍ കള്ള് കുടിക്കാന്‍ ഇവിടെ സൗകര്യമുണ്ട്. അവിടെ ചെന്നിരുന്ന് രണ്ട് കുപ്പി കഴിച്ചാല്‍ ഫ്‌ളാഷ്ബാക്കുകള്‍ ഓടിയെത്തും.. ഹൈസ്‌കൂളില്‍ പഠിക്കുമ്പോള്‍ ട്യൂഷന് പോയിരുന്ന പാരലല്‍ കോളെജ് നിന്ന സ്ഥലത്താണ് കള്ള് ഷോപ്പ്.... കള്ളിന്റെ ലഹരിയില്‍ പഴയ കാലമെല്ലാം ഓടിയെത്തും.... ഫീസടയ്ക്കാത്തതിന് നമ്പൂതിരി മാഷ് ചീത്ത പറയുന്നതും.. വര്‍മ്മ മാസ്റ്ററുടെ കണക്കിന്റെ മാധുര്യവും... അങ്ങനെ പലതും...

അനിയത്തിപ്രാവും മണിച്ചിത്രത്താഴും തലയണമന്ത്രവുമെല്ലാം കണ്ട കൈരളി ടാക്കീസ് ഇന്നില്ല... അതിന്റെ അസ്ഥികൂടം മാത്രം സിനിമാ പ്രേമികളെ വേദനിപ്പിച്ച് അവിടെ തന്നെ നില്‍ക്കുന്നുണ്ട്... പണ്ട് സ്‌കൂളില്‍ പഠിക്കുന്ന കാലത്ത് പാത്തും പതുങ്ങിയും മൃദുലയും പാവം ക്രൂരനും ലയനവുമെല്ലാം കാണാന്‍ കയറിയ പ്രഭാത് ടാക്കീസും ഓര്‍മ്മയായി. പകരം ഐശ്വര്യ എന്നൊരു സിനിമാശാല ഉയര്‍ന്നു വന്നു. സന്ധ്യയും സന്തോഷുമാണ് മറ്റ് രണ്ട് തിയേറ്ററുകള്‍... പത്താം ക്ലാസിലെ പരീക്ഷയുടെ തലേന്ന് ഒരുക്കം എന്ന സിനിമ കാണാന്‍ പോയത് സന്തോഷിലാണ്... അതെല്ലാം പരീക്ഷ കഴിഞ്ഞപ്പോള്‍ അറിയാനുണ്ടായിരുന്നു. വല്ല വിധേനയും പാസ്സായി എന്ന് ആശ്വസിക്കാം... ലാലേട്ടന്റെ പല സൂപ്പര്‍ഹിറ്റുകളും കണ്ടത് സന്ധ്യയില്‍ വെച്ചാണ്... തേന്മാവിന്‍ കൊമ്പത്തും സ്ഥടികവും.. അങ്ങനെ പലതും...

കൈരളി റോഡില്‍ നിന്ന് വാങ്ങുന്ന മദ്യം അകത്താക്കാന്‍ ചില കേന്ദ്രങ്ങളുണ്ട്... വീടിനടുത്തുള്ള വയല്‍ക്കരയാണ് പ്രധാന കേന്ദ്രം... നല്ല കാറ്റേറ്റ് ഹണി ബീ അകത്താക്കുമ്പോഴുള്ള സുഖമുണ്ടല്ലോ... അത് പറഞ്ഞറിയിക്കാനാവില്ല... സുഖിച്ച് സുഖിച്ച് ഒരു നാള്‍ ചീട്ട് കീറി... ശരീരവേദനയും ഛര്‍ദ്ദിയുമൊന്നും നില്‍ക്കാതെ വന്നപ്പോഴാണ് ബ്ലോക്ക് റോഡിലെ ശങ്കരന്‍ ഡോക്ടറെ കാണാന്‍ പോയത്... ഡോക്ടര്‍ എന്തൊക്കെയോ പറഞ്ഞു.. കരളിനെന്തൊക്കെയോ പ്രശ്‌നങ്ങളുണ്ടത്രെ... ഇത്തോതില്‍ പോയാല്‍ വേഗമങ്ങ് പോകാമെന്ന് ഡോക്ടര്‍ പറഞ്ഞതോടെ കൈരളി റോഡിലേക്കും ഓര്‍മ്മകള്‍ പുതുക്കാന്‍ ഉദയാ കോളെജിലേക്കും പോവാതായി...... മദ്യത്തിനെതിരെ ബാലുശ്ശേരിയില്‍ ഉയര്‍ന്നു വരുന്ന വലിയൊരു പ്രക്ഷോഭത്തെ സ്വപ്നം കാണുകയാണ് ഞാന്‍.. യുവ തലമുറയെ നശിപ്പിക്കുന്ന മദ്യത്തിനെതിരെ എന്നാണ് ബാലുശ്ശേരിക്കാര്‍ക്ക് ബോധമുണ്ടാവുക... മദ്യത്തിനെതിരെ അരിക്കുളത്ത് നടന്നപോലെ വലിയൊരു ജനകീയ മുന്നേറ്റം ഇവിടെ വരില്ലേ... ആരോടുമുള്ള സ്‌നേഹം കൊണ്ടൊന്നുമല്ല.... നമുക്ക് കിട്ടാത്തത് ആര്‍ക്കും വേണ്ട എന്ന അസൂയ മാത്രം..... പ്രലോഭനങ്ങള്‍ ശക്തമാണ്.... സ്വപ്നങ്ങളില്‍ ഇപ്പോഴും നുരയുന്ന മദ്യ ചഷകമാണ്.... കൈരളി റോഡിലേക്കുള്ള തിരിവില്‍ ഞാനിപ്പോഴും പകച്ച് നില്‍ക്കുകയാണ്................